أبرز ما جاء في كلمة رئيس التيار الوطني الحر جبران باسيل

نحنا اليوم بعهد جديد وحكومة جديدة مدعومين من الخارج بالكامل، وعندهم موافقة عريضة من الداخل، بين ايديهم مهمّة فورية واضحة وهي تنفيذ الـ 1701 واتفاق وقف اطلاق النار، يعني سحب السلاح من حزب الله، وفي مهمّة ثانية لاحقة ومخفيّة هي التطبيع مع اسرائيل

رئيس الجمهورية بخطاب القسم والحكومة بالبيان الوزاري حكيوا عن احتكار السلاح بيد الدولة، ونحنا معهم – والقوات هيك حدّدوا مهمة الحكومة وانو ما تعمل شي ثاني، وهنّي بدهم وفيهم. عندكم كل الدعم اللازم، تفضّلوا الى التنفيذ

في شغلتين منعارضهم:
1 – سحب سلاح من خلال حرب أهلية بدل ما يكون من خلال تفاهم ولو مفروض
2 – تطبيع مفروض من دون حقوق بدل ما يكون سلام عادل مع حقوق

نحنا منعتبركم المنظومة الحاكمة لبنان مالياً وسياسياً من الـ 90، وانتوا بتعتبرونا دخلاء عليكم ولتخلصوا منّا عملتوا كل شيء واتّهمتونا بالفساد، وقامت علينا ثورة موجّهة من الخارج والداخل، ولو فيها ناس طيّبين، ولكن يلّي قادوها ناس مسيّسين ومنظّمين كمان اتّهمونا بالفساد

تفضّلوا، كل الوزارات والملفات بين ايديكم وكل الحقائق تحت عيونكم، تفضّلوا تحرّكوا ونحنا جاهزين للمساءلة، وأي فضيحة علينا وسرقة مال عام ما تقصّروا وخدونا على المحاسبة! بس اذا ما لقيتوا وما رح تلاقوا، اقلّ شي تعتذروا من الناس!

شو رح تعملوا بالملفات؟ اذا متل ما بلّشتوا بالاصلاحات، يعني كارثة! معقول بأوّل جلسة لحكومة قائمة بتقرّوا بمرسوم، موازنة من حكومة مستقيلة وبعد ما اجاكم وقت تقرأوها؟ صارت نافذة، فيها ضرائب مجنونة وما فيها الاصلاحات المطلوبة… هيدي رؤية الحكومة الاصلاحية؟ وين الوعود؟

نحنا رح نطعن، لحتّى نجبركم تشتغلوا على موازنة اصلاحية! هون اهمية المعارضة تكون ايجابية. فينا نترككم بلا اصلاح وتفشلوا وننتقدكم ولكن لا! لازم تسقط الموازنة لحتّى تعملوا أحسن منها بكثير وقادرين